فايروس كورونا والاطباء الايطاليين

انتشر بهذه اليومين مقال على اساس نقلا عن اطباء ايطاليين مكتشفين فايروس كورونا هو مو فايروس وانما بكتريا

وان علاجه هو مضادات حيوية
وان السبب الرئيسي للموت بيه هي التجلطات
وانه ما يحتاج الى انعاش رئوي وانما مضادات تجلط

خلوني افند الادعاءات واحد واحد...

#الإدعاء_رقم_١
كورونا بكتريا مو فايروس
حتى لحد يزعل من الموضوع نقرا التركيب الجيني للكورونا من خلال مجلة Lancet الرصينة واللي مسويه بيه تحليل جيني للفايروس
رابط المقال واللي تثبت انه هو فايروس:
https://www.thelancet.com/pdfs/journals/lancet/PIIS0140-6736(20)30251-8.pdf

#الادعاء_رقم_٢
انه علاجه مضاد حيوي
بعد ان اثبتنا انه كورونا هو فايروس
اذا المضاد الحيوي ماله اي علاقة
ممكن نوصف المضاد الحيوي لعلاج الالتهابات البكتيرية الثانوية للكورونا
بس يبقى هو فايروس وماكو اي علاقة بين الفايروس والمضاد الحيوي (شراب الالتهابات).

#الادعاء_رقم_٣
سبب الوفاه هو التخثر و ليس عجز التنفس!!
الحقيقة انه التجلطات الدموية تصير في ٢٠ % من الحالات اللي يصير بيها كورونا
و اصلا منظمة الصحة العالمية ناصحة باستخدام الهيبارين في بعض حالات الكورونا
واصلا بدراسة من فرنسا مو من ايطاليا تكول انه التخثرات تصير في ٢٠٪ الى ٣٠% من الناس اللي يصير بيهم كورونا.

وهذا رابط الدراسة الفرنسية
https://pubs.rsna.org/doi/full/10.1148/radiol.2020201544
اما عن سبب الوفاه فهو العجز التنفسي
حسب الدراسة المنشورة من مجلة Lancet
https://www.thelancet.com/journals/lanres/article/PIIS2213-2600(20)30165-X/fulltext

#الادعاء_رقم_٤
ماكو اي داعي للاجهزة التنفسية والانعاش الرئوي!!!
في كل العالم وفي كل دول العالم ومن المختصين بالكورونا سبب الوفاة هو اما عجز التنفس او فشل الكلية او فشل متعدد في الوظائف الحيوية
و من خلال لقاء مع sergio Harari اللي هو رئيس فرع الوحدة التنفسية في مستشفى ميلان بايطاليا و عبر مجله
Corriere della sera
كال بيها ان سبب الوفيات الرئيسي في ايطاليا هو ذات الرئة وعجز التنفس
المقال الرابط مالته هنا:
https://www.corriere.it/salute/cardiologia/20_aprile_14/eparina-testata-contro-covid-ma-presto-dire-che-cura-fec80502-7db3-11ea-bfaa-e40a2751f63b.shtml

لعد منين اجتي الاشاعة؟

الاشاعة جتي من موقع غير موثوق نيجيري مسؤول عن الترويج لافكار مغلوطة كثيرة
والملفت للنظر انه كاتب بنهاية المقال انه الموقع غير مسؤول عن اي اخطاء بالمقال

رابط الموقع الغير موثوق هو التالي
https://www.efogator.com/2020/05/breaking-how-italy-doctors-disobeyed.html

تحقيق د. سيف سمير البياتي

#تنتهي_ويانة
#it_ends_with_us
#Tech4Peace
#T4P