التوعية جداً مهمة ..

التوعية جداً مهمة ..

من مبدأ الوقاية خيراً من العلاج ونظرا لتزايد حالات الاصابة بفايروس كورونا COVID-19

اذا كنت راجع من السفر من دول فيها فيروس الكورونا مثل (الصين - ايران - ايطاليا) او اي دولة اخرى فيها فيروس كورونا او بتماس مباشر مع شخص راجع من السفر لدولة فيها فيروس الكورونا فلازم تفصح بهالشي لمن تراجع مستشفى او مركز صحي.

واذا ظهرت عليك اعراض الانفلاونزا (ارتفاع درجة الحرارة - العطاس المتكرر - سيلان - احتقان البلعوم) لازم تراجع المستشفى القريبة عليك ولتحاول تتكتم عالموضوع لان مو عيب تذكر انه انت مصاب او لديك هذه الاعراض او كنت بتماس مباشر او قمت بالسلام على شخص كان مصاب او عائد من سفر لدولة فيها فيروس الكورونا.

لا تخفي اي معلومة عالكادر الصحي لان حتعرض حياتك وحياة اهلك وحياة الكادر الطبي والتمريضي للخطر، وان اخفاء المعلومات يؤدي الى تعريض حياة الناس للخطر الامر الذي يتعارض مع تعاليم جميع الديانات السماوية والاسس الاخلاقية والانسانية لان حينتقل المرض الهم.

بسبب هالشي صارت عدنة عدة حالات مو حالة وحدة وهالشي يسبب كارثة خصوصاً لاهلك وللكادر الصحي (اطباء وممرضين) لان همه بتماس مباشر مع عدد كبير من المرضى واذا احد منهم انتقلته العدوى بسببك فراح تسبب كارثة بسبب تكتمك عالموضوع.

الرجاء:
• افصاح المعلومات للطبيب سواء بالمستشفى او بالمركز الصحي ومو عيب ولا راح يسبب بصمة عار بالنسبة الك على العكس انت هيج حتساعد نفسك وتوفر وقاية لاهلك وللكادر الطبي المسؤول عن علاجك لان يكون عدهم علم باصابتك ويتخذون كافة الاجراءات لغرض علاجك ولغرض الوقاية والحد من انتشار الفايروس لاهلك وللكادر الطبي وللمرضى بداخل المستشفى.

• المرض مو مميت يعني ميخوف ... فقط اللي عنده امراض مزمنة او اي مريض مناعته ضعيفه ... هنا الحالة تخوف ... وهالكلام مو معناه خلص لازم اعوف الوقاية! بس بنفس الوقت الوقاية ضرورية جدا.

حالات صارت في بغداد وكربلاء:

١. الحالة التي حصلت في بغداد كانت تعاني من مرض مزمن ومستمرة على ادوية تهبط المناعة وكانت مصابة بفايروس كورونا ولكن ذوي المريضة لم يبلغو الكادر الصحي بذلك، توفت المريضة وبعد الوفاة تم الاعتراف و بسبب هالشي كل الكادر الطبي والتمريضي اللي كان بتماس مباشر مع المريضة تم عزلهم لغرض التأكد من سلامتهم وعدم اصابتهم وهالشي اثر بشكل سلبي على عدد الكادر الصحي.

٢. الحالة للمريضة بمحافظة كربلاء اللي توفت ايضا بسبب الفايروس واهلها تكتمو عالموضوع لغاية وفاتها اعترفو بان المريضة عائدة من ايران قبل 7 ايام وايضا الكادر الصحي بكربلاء بتلك المستشفى حاليا حيتم عزلهم لحين التأكد من سلامتهم.